Search
WAP/PAD

Sanghi qap 首页 >> >文艺

Zam zvam jo lo e mvomyi

景颇族搭桥的故事

作者:闵建岚
来源:德宏团结报 发布时间:2019-03-22 09:25:33

Hikun wa lawa ma,  chuizo yuqge zo layuq nyi e ga, yvang adviq za mai yvangnu yvangwa eq shi gvang byvam dvo mu, yvangzhvi eq za nyi gvo lo e ga. Nvik ashau jing ashau zen e chuizo ngvu ri yvangzhvi eq za nyi gvo lo mu, yvangzhvi haizui haisai zhang hai bi dat zui  girum e layuq ngvut le.Chuizo xiyuq lanyi eq lanyi gvo lo nyi be, asu e  yvangnvik yvangzhvi bau za nyi mu, igvun ashau wui, ayak akak zhaq yvang  myung gvo e ga.Amyang ma, yvangzhvi gi yvangshu ri zhaq awam gang gu e gauwa byuwo bve       zhvang nozung gvunzhang e wang nvang be, lanyi ma gi, chuizo no e bi zung byi e yvum ma e yvumsing po gi butpyit e be ga, akun zhang butpyit su eq lvom pyittoq byi e gi isu ngvu lvom dai e gi:“ Nangyvum ma gauwa ma bing layuq nyi ri angvut lvu?”ngvu myi zhang, byupo hauyuq gi:“ Ngvut le mvai, gauwa ma yuqge zo layuq ri nozung nvang dvo le.” ngvu dvu daijvo zhang, “Nang yvum ma bing hau nang akui yvang rau lo kat byvam aq, hau za angvut zhang gi nangyvum ma yvang shi bi ra, nang yvang e mang myang nyvup bi ra raurau yvang lo kat byvam aq o.” ngvu butpyit su dai be ga, hamai byupo hauyuq gi butpyit su eq daijvo e jo mizving chung lui, yvum shut hanhan yvang lo be ga.

Byupo hau kama lvang ayap ano la shoq dinso so izhvang myit toq gvun e gi byuzo hau ri kadong mai sheq lo kat byvam wu ra lvu ngvu son wui nyi lui,  yvang wo myittoq gvat e gi yvangzhvi no ri  ngvu lo mvau dai mu lo kat byvam ra ngvut ra ngvu  be ga.Yvang abun e su ga ma yvum din zhe dvo lang be, yvang chuizo ri lo myang eq:“ Nang akui yvang nungmoq yvum rau lo aq, subve eq le daijvo gvat gvo ri nangzhvi rau shi be ga le shit gvat agvo, nang laqing lvang ki nung gvun lo. ”ngvu ga, haumai chuizo jo dan mu dum dvu myi e gi:“ Ngo lanyi le za lo wu ri lvang ngazhvi hai ara wa, kisu mu be lvu.”ngvu dan mau dvo lui, byupo hauyuq dumdai e gi:“ Mangzo bve mang be mai gi kayuq ka kun no ra shi ra ri ase dvo, nang rau lo aq koi, laqing ri kanyi gvun loq.” ngvu, haumai chuizo ri yvang e ze hen chung mu yvum-    pyang lo be ga.

Chuizo gi yvum lo qo ma kama lvang awam nyigvun lo shoq dingso so be, azhang laqing zo ma mauzau lo be, laso laso zhang maumo wo lo be, chuizo yvum lo qolat ma lagung du e mebu dveqdveq dut shoq maumo lo bat be ga. Dum so dum so zhang chuizo yvang lvang gi joq le asho awui gvut lo nyi le ma, wuihong zvomra lam gu ma lo nopdvap gvat le ngvu zhang, bauwoq zo ladu ri dungbyung eq byvungmyvu jo lo e lo myang gvat be. Bauwoq zo hau gi kaqo ri akap dut nyi lang lui, wuihong hau ma myujam dvo be, chuizo gi bauwoq zo ri lo wu shijo dik lui qo yam ma yuq dvo e qunbu gam zo ri myvitqui lui, bauwoq zo ri zvamdvap gvat e ga, haumai bauwoq zo gi wo gu do dvap lo be ga, chuizo bauwoq zo ri gvang lo wo qi dvo mai  gi,    yvumshut hanhan yvang dum dvoq so zhang, bui lvang ne wang lo be zhang sheq yvangmoq yvum wo zhe dvo be ga.

Chuizo yvum zhe eq yvumbvan mai yvangzhvi ri lo wut gvat zhang, yvangzhvi gi jo mau mu:“Ngashu gi haidut be lvu o? ” ngvu dintoq le be ga, hauzhang yvangshu gi:“ Azhvi nang rau shi be ga e wo jo lui, ngo nang ri lo wu le.” ngvu dai zhang, yvangzhvi hi jodan lui dum myi e gi:“ Oyuq dai ri lvu? Ngo hailvang ara wa, ashau yvang wangzan nyi le nving.” Ngvu ngau bvodap lvum bigvo. Yvangnvik ngauji lvum gvo mai daijvo e gi:“ Azhvi oi, ngo no e bi zung e yvum ma yvumsing po daijvo ri, nganvung wa bang eq le daijvo gvat gvo ri nang rau shi be ga. ”ngvu daijvo zhang, yvangzhvi gi ngo xi joro cam- myvi za lvang ano wa ngvu yvangshu ri daijvo e ga. Chuizo yvangmvoq yvumma isum nyi lo nyi  zhang, yvangzhvi dum dai e gi:“ Ngashu oi, nga paumyi e yvum gi igvun wui le nang ri se dvo be, nozung rau dum e aq koi, azhvi ri ki uqi. ”ngvu ga, haumai chuizo gi yvangzhvi ri gvunzhang ngun byi byvam dvo e mai:“ Azhvi oi, wangzan za gvut nyi lang aq o.” ngvu sang byvam dvo e mai, yvang gi gauwa shut nozung gvunzhang dum e lo be.

Chuizo yvang nozung gvunzhang yvum ma dum zhe zhang, hauyvum bang gi layvum bang yvang lvom juq  lvom dan na shi bigvo ga, haumai chuizo ri lvom myi gvo e gi:“Nang haimu ashi e lanyi ashi luq? Nang yvum ma hai lo gvut e?” ngvu lvom myi zvuq dvo bigvo ga. Chuizo gi :“ Ngo yvum ma hai ri alo gvut mvai, ngo nang eq ngazhvi rau shi be ga lui za lo wu e, asu e ngazhvi gi hai ara lang, nang sheq ngo ri mvau dvo nving, ngo gadvu hai ri alo gvut mvai, akun ngazhvi rau shi be ga lui wa, ngo ri sheq gi haimu ashi e ga dum myi gvo e gi, ngo kisu ngvu adat daijvo loq o, haimu isu ngvu myi agvo lvu?”ngvu dvau myi zhang, yuqge po gi chuizo ri lago za daijvo e gi:“ Ngo he joro butpyit lo ri butpyit su eq lvom pyittoq byi e gi nang e yvum ma nozung su xi joro ma yvang shi bi ra, nang akui za alo wo katbyvam zhang nungmoq yvang e byumang myang nyvup bi gvo ra ga lui, ngo nang ri kasu ngvu adat kat lui nangzhvi rau shi be ngvu mvau nvang gvat e ngvut le .”ngvu ga.

Byuwo bve yvum bang chuizo ri yvum ma haizhung nat wa lo sai byvam wu e lvu, lago daijvo wu aq ga lvum myi dvo gvi lui, chuizo jo mau dvo be, haumai yvang qolat ma bauwoq zo ri zamzvam byi e wo myitbun gvat mu, dum daijvo e gi:“ Nang ngazhvi no ri ga daijo mai ngo yvum lo e haunyi, maumo wo mu wuihong ma bauwoq zo ladu myujam dvo e lo myang lui, qunbu gvoqzo eq zam lo zvam byi e, haumai bauwoq zo wo dodvap lo be.” ngvu daijvo zhang, byupo hauyuq dum wo myittoq dai gvat e gi:“ Nang shi ra za e bauwoq zo ri zam lo zvam byi gvang lo qi mu lui, nang shi ra za e ashi lo ngvut ra.”ngvu dai byi e ga.Haumai chuizo gi imyit ashau yvang jo ngon be ga, zamzvam zhang gi midoq ri wo rot mu, haunyi bui mai nganvung wacang zowui gi zam dat zvam jo lo e ngvut le ga.      

  (Gvasu : Lapai Mudvom)

编辑:赵芹芳

Logidat paqzhvi 科普

more

Laili laigva 文艺

more
Copyright by DHTJB.COM. All Rights Reserved.