Search
WAP/PAD

Sanghi qap 首页 >> >文艺

Yvangwa eq yvangzo dai lvum e dang

父子对话

作者:闵建岚
来源: 发布时间:2019-02-21 11:25:32

(六)Zoshang 9zan be, nambat 4zvang zhong doq nyi ra, soncham laigva sanbvoi wang ri a-ong lui, nyi angon dut nyi ra.

“Haimu be?Sanbvoi a-ong ri ngamoq ri azhvoi myoq isam byi e gi.”

“Soncham laigva sira ri ngo awu nau dik, yvang dai e zhongmvoq kun ri ngo ajo nau.”ga zoshang aqak mo su dai be.

“O,kisu mu yvang ri angui lvu?Daijvo wu aq.”ga yvangwa dum dai be.

Yvang xisu mvosu dut ra ga lazhin mo dai lo be, “Kisu ga ri yvang ri ngo ri angui.”ga.

“Wai, hau gi subve nang ri wu nau zhang sheq nang yvang ri la wu nau ri dvi? Subve nang ri awu nau zhang gi nang ri yvang ri awu nau dut e gi, hai lazhvum? Nang gi imyit doqdan abo su byu angvut lvu?”ga yvangwa dum dai be.

“Ngvut le.”ga yvangzo dvu be.

“Nang gi gvunggat byu, angvut mu gi nyvom dik byu?Gvo su angvut mu gi dviq su?”ga yvangwa dum myi zhang, yvangzo gi:“Nyvomdik byu,dviq su.”ga nyvomnyvom za dvu be.

“Asu nang gi gvo su gvut ra angvut mu gi dviq su gvut ra?”ga yvangwa dum myi be.

“Gvo su gvut ra, awa, ngo se be, sira ngo ri ngui angui gvilvang ngo yvang ri ngui ra dut le, yvang ri kungga ra dut le, ngo myit doqdan bo e byu gvut mu, gvunggat byu gvut ra.”ga dai be.

Haunyi mai, zoshang nguingon zhongdoq mu, soncham laigva ri wo mvoq ge be.Lai lui, yvang hai ri gi byugvo byudviq ga e ri se be.


(七)Zoshang 10zan bo be, nyiwui dennau yuqxi za sup gvun mu, yvangnu kimyvo mvoqjvo ri re awo lai.

“Ngazo e, nang nyiwui yuqxi xi za sup le angvut lvu?”ga yvangwa dennau ri dvun dvo mu myi be.

“Ngvut le.”ga yvangzo ungut ngut lui dvu be.

“Nang yuqxi si ban sup tang ma gi kisu ga le?”ga yvangwa dum myi be.

“Myit ma agvom mo su ga lui hai ri lazhvum abo e su ga, yvumsing gung yvumsing nvikyo nau, yvumsing gung yvumsing wu dviq byvam dut ra.”ga.

“Asu nang haimu la sup nau ashi dvi? Yvumsing gung yvumsing awo tangzing angvut lvu?”ga yvangwa dum myi zhang.

“Ngvut le, awa.”ga yvangzo zhaqyvang wum-o aluq su gvut lui dvu be.

“Em, awa nang ri girum ba.”ga izhvang, dennau e waq lo e mai chuize zo lalvum yvangzo ri lo byi lui:“Ngazo, dennau xi ri batqop   byvam aq.”ga dai be.

Yvangzo gi jo mau yap dvo lui:“Awa!”ga.

“Batqop byvam aq, awa dennau awo ge gvut le, asu ngazo nang ri awo age dut.”ga dai be.

Yvangzo gi ngaubyi duidui gu dennau batqop dvang byvam be.

Haunyi mai, zoshang gi hai ri gi changgan ga e se be.

编辑:赵芹芳
Copyright by DHTJB.COM. All Rights Reserved.