Search
WAP/PAD

Sanghi qap 首页 >> >科普

Yvangwa eq yvangzo dai lvum e dang

作者:闵建岚
来源:德宏团结报 发布时间:2019-01-29 10:38:56

    (四)Zoshang 6zang bo be, yvang gi ki- nvam lvang zo za se ra.

Lanyi myintang zhong gvat tang ma, maidvanglau ung zhang ma zhe myang zhang,yvang gi jo yap gvat lui:“Awa, maidvanglau!”ga lui wuidui lvang dui shoq dut dvo be.

   “E, maidvanglau, zo nau le lvu?”ga  yvangwa myi be.

   “Zo nau ra!”ga yvangzo dai be.

  “Ngazo e, byu layuq ngvu e gi hai ri zo nau lui zo zhang kui myoqjveq, zo nau gu azo wo gvut zhang gi sire.”ga le, “Nang gi kui myoqjveq gvut ra lvu, angvut mu gi sire gvut ra?”ga yvangwa dum myi zhang, yvangzo gi:“Awa, ngo gi sire gvut ra!”ga be.

“Gedik be, akun sire wa e, maidvanglau zo nau zhang kisu gvut ra?”ga yvangwa dum myi be.

Yvangzo gi:“Azo, azo!”ga be.

   “Gedik be, ngazo sire wa e, yvum lo goq koi.”ga yvangwa dai lui, yvangzo gi ashau zo nau gu wuidui dui ngvut gvilvang mai   dvanglau hau azo e yvum shut bi lo be.

Hautang mai, zoshang gi hai ri ge zo, hai ri azo ra se lui, kisu e nve ze ri lvang wo tang ra.


    (五)Zoshang 8zang bo be, shai le ashau, zhong ma zhongzo numnang bve eq bat lvum lui, damko baubau za eq yvum shut zhe lo mu, lo ngau nyi be.

    “Anyen zo su ga be lvu?”

   “Ga le!”ga .

   “Don be lvu?”

  “Don dik be!”ga lui, ngaute zhe gvo lo be.

 “Nang kisu gvut ra ngvu son dvo le? Awa nang ri hai abi gvut byi ra lvu?”ga  yvangwa dum myi be.

“Awa, ngo gi zhvonmo lalvum eq yvang ri numtang mai e du nau ra!”ga yvangzo dvu be.

“E, ge ra, awa napma nyi nang ri zhvonmo latung hen byi gvat le, haumai lai lui hai ra ashi?”ga yvangwa myi be.

Yvangzo gi:“Awa, shamto lalvum ra ashi, napma nyi ngo yvang numtang mai shamtoq eq e tau ra!”ga.

“E, ge le, xisu zhang don e zhe wo ge le, awa nang ri xibve lo ho dvo byi le”ga lui, yvangwa gi yvum toqzvang shut doq lo be.

    Nayi 20fen gvo ma, zoshang gi ngau e num lo be.Yvangwa gi mebu labum mo waq lui jo lo mu, yvangzo ri:“Ngazo e, nang son ge be lvu, zhvon eq e du ra, angvut mu gi shamto eq e tau ra?”ga myi zhang, yvangzo gi:“Awa, asu nang haimu mebu haumyvo myvo yu jo le lo le?”ga mau na shi lui myi be.

“Ngazo e, xisu ngvut le, laqma nang su nang zhongzo numnang ri zhvon eq e du zhang gi je bve nang ri shui lo mu lvomo laqap gvo lo dat lvung le, hausu ngvut zhang gi nang mebu xi yvam gu za yu chung aq;Laqma nang yvang ri shamto eq e tau zhang gi tong ma 3zan gvo lo lung ra dut le, hau zhang gi mebu xi tutu gu yu chung ra dut le, ngazo nang son ge be lvu?Kadong gvut ra? Awa nang ri bi girum le.”ga yvangwa dai be.

“Awa, xisu yvang ngvut le lvu?”ga  yvangzo jo dan jo mau dvo be.

    “Xisu yvang ngvut le, zhvum dvira gi xisu ga misat dvo le.”ga yvangwa gi yvangzo ri zhvum dvira sai mvoqjvo be.

    “Awa, xisu ngvutzhang gi hai ri bi shau gvut lo!”ga yvangzo dai be.Yvangwa gi:“Nang ashau don e angvut dvi?”ga dum myi zhang, yvangzo gi:“Heqheq, awa, akui ngo anvikyo nau lo, son gvat wu zhang ngo ri shut e bo ra.”ga myoqzo gi nene za dai mvau lo be.

“Ngazo e, nang xisu ga dat myit ri gi zhaq ge ra, awa nang ri qe-on le!”ga yvangwa zhaq jo gibu be.

Haunyi mai, zoshang gi haimu ri kadong piran ra se be.

(Puq lazhang su Kongno)

编辑:赵芹芳
Copyright by DHTJB.COM. All Rights Reserved.